VACACIÓNS

Xa estamos de vacacións de Semana Santa ou de Pascua... rematou o 2º trimestre... foi moi longo. A verdade e que traballaron a reo estes rapaces durante esta tempada, e están moi cambiados con respecto ao 1º trimestre: máis traballadores e obedientes, adquiriron novos conceptos e contidos, fixeronse todos/as bastante amigos/as, son moi autónomos e melloraron a súa actitude persoal e o hábito de escoita... así que eu coma MESTRA que son síntome moi orgullosa deles, considero que teñen MERECIDISIMAS estas vacacións: que xoguen, desfruten das actividades ao aire libre e descansen, o 3º trimestre vai ser moi curtiño pero intenso, cheo de moitas novas e sorpresas na dinámica de aula.

As clases retomaranse o martes 10 de Abril no horario habitual. Ata pronto!

TRABALLAMOS COA PRENSA

¿Sabedes por qué celebramos nos coles a semana da prensa? Indagando un pouco… averiguei que a “Semana da Prensa” foi insituída en Galicia por iniciativa de La Voz e celebrouse por primeira vez en abril de 1989.

Dende entón aparece anualmente rexistrado na nosa orde de calendario escolar, habitualmente a celebramos a mediados do mes de marzo, dita orde especifica que alomenos “un día desta semana traballarase cos xornais nas aulas”.

Nós tamén o celebramos a outra semana, estivemos enredando cos xornais, buscando letras, identificando símbolos, cores, números… e había moitas fotos de diversas cousas, e incluso mapas e tamén poñían o tempo (con debuxiños de sol, nubes…) foi moi interesante e algúns estiveron moi concentrados.

Tamén Papelote nos trouxo un xornal xigante onde aparecíamos todos nós e a noticia máis importante era que a primavera chegara ao Burgo.

MIRADE QUE XORNALISTAS MÁIS GUAPOS E GUAPAS

DIA DA AUGA

Hoxe día 22 de Marzo celebrase o Día Mundial da Auga

É importante concienciar aos máis pequenos da importancia que ten a auga nas nosas vidas. O seu consumo descontrolado ten consecuencias negativas para o entorno natural e os seres vivos.

Faleilles de cerrar ben os grifos e empregar tan só a auga que necesitamos: na ducha, cando lavamos as mans, os dentes, non deixala correr sen máis... e sobre todo non xogar coas cisternas! (dado que lles gusta bastante) de feito hoxe rompeuse unha por andar xogando e inundouse o baño, menos mal que temos a Super-Alfredo o noso conserxe que o amaña todo, todo, todo...non sei que faríamos sen él! 

Por iso tan só me queda dicir: CADA GOTA CONTA

Hoxe levamos a nosa gotiña de auga coma homenaxe

a este día. 

22 DE MARZO DÍA INTERNACIONAL DA AUGA 

PRIMAVERA

Hoxe é 20 de Marzo e deu cambio á nova estación: A Primavera.

Cando chegamos á clase tivemos unha sorpresa... alguén (Papelote ou a "Señora Primavera") nos deixaron unhas sementes de cabazas, un sobreciño de sementes variadas, e ademáis unha maceta cunhas prantas (agora temos que coidalas) esta maceta tiña unha rá moi chula a cal lle chamamos a "rá Manola".

Estivemos prantando nas macetas as sementes... e como somos un pouco "urbanitas" o fixemos nas carretillas dentro da clase e todos fumos observando, colaborando e  participando en  todo: remexer a terra, botar sementes, auga ... e incluso atopamos un gusano vivo na terra!

FELIZ DÍA DO PAI - 19 DE MARZO DO 2012

Hoxe é 19 de Marzo "Día do Pai".

Felicidades a tódolos pais dos meus nenos e nenas, esperamos que vos gustase o noso agasallo, seguro que foi toda unha sorpresa e non sospeitachedes nadiña!

Era un segredo! ... a voces.

MIRADE QUE CHULAS!

"ROSALIANDO" NO BURGO

Ao longo da semana fixemos moitas cousas diferentes: que si un contiño, falar e falar, pintar, facer as nosas letriñas, números, psicomtricidade, xogar, cantar, algo de baile... Pero o máis significativo quizás fose que falamos dunha señora chamada Rosalía.... E por qué  fixemos isto? 

Porque este ano celebramos o 175 aniversario do nacemento de ROSALÍA DE CASTRO, unha das  escritoras máis emblemáticas da Literatura Galega. Dende a nosa aula quixemos rendirlle un pequeno homenaxe, elaborando un libriño para o seu cumple (coma facemos sempre que alguén cumple na clase).

Os contidos foron adaptados aos máis pequerrechos: conteilles que vivía nunha casiña de pedra en Padrón, gustaballe moito escribir, adoraba Galicia, a natureza... entre outras, tamén que levaba posto un vestido negro  que lle chegaba ata os pés, tiña o pelo rizo, escoitamos a canción "Negra sombra" cantada por Luz Casal e un anaco dun poema "Chove miudiño, miudiño chove...." o cal lle dimos interpretación.

O máis sorprendente: Tiña un billete!! onde aparecía a súa cara e a súa casiña en Padrón.... Pero non se pode comprar nada con él...!  As pesetas non existen,  os euros sí!

(palabras textuais dun neno... que listiño!!)

MACEDONIA 2012

Aquí está a tan esperada fotomontaxe da macedonia celebrada o xoves. Como podedes observar  tivemos moita colaboración... e estabamos organizadísimos: a profe Pilar encargabase da  "sección" limpeza de froitas, a profe Sandra  dos exprimidores (debimos sacar preto dos 2 litros) a profe Maite dáballe xeito co coitelo a toda a froita, pelaba e cortaba a unha velocidade incrible, despois axudoulle Pilar e Clara fixo de reporteira gráfica. O resto xa o sabedes... comimola toda!

Despois da desgustación da macedonia, descansamos no recreo e á volta valoramos á actividade: se nos gustou ou non a froita que probamos.

HUGO MARIN ESTÁ DE CUMPLE

Nesta primeira semana de Marzo tivemos dous cumples... o da profe e o de Hugo Marin. O venres o celebramos todos/as xuntos na clase . Levamos unha semana gastronómica moi variada: macedonia, gusanitos, bizcoito, moedas de chocolate... moitas lambonadas!!

Feliciades pequerrecho no teu día!

AVISOS

Ultimamente o tempo anda bastante "tolo", ainda que non chegou a Primavera... este SOL resulta bastante "traizoeiro" para as nosas cabeciñas, por iso preciso que lle mandedes aos cativos/as unha gorra para ter na clase de maneira permanente (para poñer no recreo e despois do xantar). É importante poñerlle nome, de vez en cando as irei mandando para lavar.

DÍA DA MULLER TRABALLADORA

Hoxe é 8 de Marzo 

DÍA INTERNACIONAL DA MULLER TRABALLADORA

Faleilles aos nenos/as deste día...pregunteilles se coñecían á algunha muller? cal foi miña sorpresa, cando a súa resposta foi que NON; recapacitei no diálogo e lles dixen... É Mamá? As avoas? As tías?... pensaron un pouco e dixeron  Siiiiiii, pregunteilles se traballaban moito ou pouco, a resposta non se fixo esperar e fíxose rotunda no grupo e sou ao unísono un: MOITOOOOOO!!!!! ante tal afirmación tan só me queda mandarvos parabéns a todas as seguidoras femeninas deste blogue polo 8 de Marzo... ainda que este día... debería recordarse todólos días do ano

Non sí?

INFORMACIÓN SOBRE A "OPERACIÓN MACEDONIA 2012"

NOTICIAS: Informamos a todas as familias, que a  "Operación Macedonia" foi un éxito. Os participantes do evento (é dicir... os vosos fillos e fillas) probaron toda a froita e incluso repetiron. Non sobrou nadiña, e iso que fixemos bastante cantidade, o único que podemos amosar (ata o momento) son estas imaxes estremecedoras: unha perola tristemente baleira, uns vasiños abandoados no lixo e as pelas das laranxas... Os pequerrechos non protestaron nada, participaron e colaboraron coas mestras.

Falo no nome de todas as que alí estivemos traballando (Maite, Pilar, Clara e eu) en que se nos enche a boca en dicir que: ESTAMOS MOI ORGULLOSAS DESTES NENOS E NENAS POLO BEN QUE COMERON. 

Xa sei que tedes moitas ganas de velo todiño pero... tan só podo amosar o RESULTADO FINAL da actividade, temos que esperar un pouquiño para ver o resto do proceso da elaboración da Macedonia.

O XOVES TOCA MACEDONIA!

O xoves 8 de marzo imos elaborar cos compañeiros/as da outra aula unha MACEDONIA moi sabrosa e natural. Cada neno/a aportará unha froita determinada.

A macedonia será elaborada con zume de naranxa, plátanos, peras, mazás, kiwis e fresas.

O importante desta actividade e que os nenos/as desfruten da elaboración e participación da receita, coñezan e intenten degustar as froitas presentadas.

Recordade non mandarlles a merenda, e non vos asustedes se algunha froita non lle gusta... non pasa nada... ás veces proban algúns alimentos por imitación dos amiguiños/as ou por que están moi animados, e non  se sinten con prexuízos, nin presionados. Polo de momento teredes que esperar ata a celebración de dita actividade para ver algunha imaxe.

- Gracias de ante man pola colaboración-

POR QUÉ NOS GUSTA PINTAR?

O debuxo é para os máis pequerrechos o seu

 “primeiro gran tesouro expresivo e comunicativo”

O contacto con diferentes soportes e materiais plásticos  estimularán e favorecerán as súas ideas, expresividade e curiosidade.

Coma mestra da aula de 3 anos B, convido a todas as familias dos meus rapaces a que os animen a facer debuxos na casa, xa que cando un neno ou nena debuxa, está traballando e desenvolvendo multitude de aspectos coma por exemplo: a mellora na súa psicomotricidade grosa e fina, forma as posteriores bases para a escritura e a lectura, afianza a confianza en sí mesmo/a, dá renda á creatividade e imaxinación, favorece o desenvolvemento da personalidade, pódese observar a madurez psicolóxica nas súas produccións, consegue unha maior comunicación cos demáis dado que os debuxos lle premiten  expresar emocións, sentimentos e moitas sensacións…  entre outros moitos aspectos.

Recordade motivalos sempre, dado que as vosas opinións son importantes para él/ela, dado que está ansioso/a de facervos partícipes… a postura que adoptedes poderá estimular ou inhibir o gusto por debuxar.  

Aquí podedes ver unha pequena mostra do ben que nos debuxamos a nós mesmos/as.